ಹೊಸ ಹೀರೋ ಎಕ್ಸ್‌ಟ್ರೀಮ್ (Hero Xtreme 160R 2V) ಬೈಕ್ ಈಗ ಕಪ್ಪು ಬಣ್ಣದಲ್ಲಿ ಮಾತ್ರ ಲಭ್ಯ
ಹೀರೋ ಮೋಟೋಕಾರ್ಪ್ (Hero MotoCorp) ತನ್ನ ಗ್ರಾಹಕರಿಗೆ ಹೆಚ್ಚು ಆಕರ್ಷಕ ಆಯ್ಕೆಗಳನ್ನು ನೀಡುವ ನಿಟ್ಟಿನಲ್ಲಿ ಎಕ್ಸ್‌ಟ್ರೀಮ್ 160ಆರ್ ಸರಣಿಯ ಬೈಕ್‌ಗಳಿಗೆ ನವೀಕರಣಗಳನ್ನು ತರುತ್ತಿದೆ. ಕೆಲವು ತಿಂಗಳ ಹಿಂದೆ ಎಕ್ಸ್ಟ್ರಿಮ್ 160ಆರ್ 4ವಿ ಮಾದರಿಗೆ ಮಾಡಲಾದ ಬದಲಾವಣೆಗಳನ್ನು ಈಗ ಎಕ್ಸ್‌ಟ್ರೀಮ್ 160ಆರ್ 2ವಿ ಮಾದರಿಗೂ ವಿಸ್ತರಿಸಿದೆ. ಈ ನವೀಕೃತ ಮಾದರಿಯನ್ನು 1.11 ಲಕ್ಷ (ಎಕ್ಸ್ ಶೋರೂಂ) ರೂಪಾಯಿಗಳಿಗೆ ಖರೀದಿಸಬಹುದು.
ಗ್ರಾಹಕರ ಬೇಡಿಕೆಯನ್ನು ಪೂರೈಸುವ ನಿಟ್ಟಿನಲ್ಲಿ, ಹೊಸ Hero Xtreme 160R 2V ಮೋಟಾರ್‌ಸೈಕಲ್ ಈಗ ಸ್ಟೆಲ್ತ್ ಬ್ಲ್ಯಾಕ್ ಬಣ್ಣದಲ್ಲಿ ಮಾತ್ರ ಲಭ್ಯವಿರುತ್ತದೆ. ಎಕ್ಸ್‌ಟ್ರೀಮ್ 160ಆರ್ 2ವಿ ಮಾದರಿಯು 4ವಿ ರೂಪಾಂತರಕ್ಕಿಂತ ಹಲವಾರು ಪ್ರಮುಖ ಬದಲಾವಣೆಗಳನ್ನು ಪಡೆದುಕೊಂಡಿದೆ. ಕಂಪನಿಯು ಭಾರತದಲ್ಲಿ ಮೊದಲ ಬಾರಿಗೆ ಈ ಬೈಕ್‌ಗೆ ಡ್ರ್ಯಾಗ್ ರೇಸ್ ಟೈಮರ್ ವೈಶಿಷ್ಟ್ಯವನ್ನು ಸೇರಿಸಿದೆ. D1 ಮತ್ತು D2 ಎಂಬ ಎರಡು ವಿಭಿನ್ನ ಮೋಡ್‌ಗಳ ಮೂಲಕ ಈ ವೈಶಿಷ್ಟ್ಯವು ಕ್ರಮವಾಗಿ 0-60 ಕಿಮೀ/ಗಂಟೆ ವೇಗವನ್ನು ಮತ್ತು ಕ್ವಾರ್ಟರ್ ಮೈಲ್ ದೂರವನ್ನು ಕ್ರಮಿಸಲು ಬೇಕಾಗುವ ಸಮಯವನ್ನು ನಿಖರವಾಗಿ ಅಳೆಯುತ್ತದೆ.
ಇದನ್ನೂ ಓದಿ: ಹೀರೋ ಎಕ್ಸ್‌ಟ್ರೀಮ್ 160R 4V ಹೊಸ ಅವತಾರದಲ್ಲಿ 1.38 ಲಕ್ಷ ರೂಪಾಯಿಗೆ ಬಿಡುಗಡೆ
ಹೊಸ ಪ್ರೀಮಿಯಂ ಟೈಲ್ ಲ್ಯಾಂಪ್ ವಿನ್ಯಾಸವು ಹೆಚ್ಚು ಆಕರ್ಷಕವಾಗಿದ್ದು, “H” ಗುರುತು ಹೊಸ ಹೀರೋ ಮಾದರಿಗಳ ಸರಣಿಯನ್ನು ಪ್ರತಿನಿಧಿಸುತ್ತದೆ. ಪಿಲಿಯನ್ ಸೀಟಿನ ಎತ್ತರವನ್ನು ಗಮನಾರ್ಹವಾಗಿ ಕಡಿಮೆ ಮಾಡುವ ಫ್ಲಾಟ್ ಸೀಟ್ ಪ್ರೊಫೈಲ್‌ನೊಂದಿಗೆ ಒಟ್ಟಾರೆ ಸೌಕರ್ಯವನ್ನು ಹೆಚ್ಚಿಸಲಾಗಿದೆ. ಹೊಸ ದೊಡ್ಡ ಹಿಂಭಾಗದ ಹಿಡಿತವು ಪಿಲಿಯನ್‌ಗೆ ಹೆಚ್ಚಿನ ಸೌಕರ್ಯವನ್ನು ಒದಗಿಸುತ್ತದೆ ಎಂದು ಹೀರೋ ಹೇಳಿದೆ.
ಎಕ್ಸ್‌ಟ್ರೀಮ್ 160ಆರ್ 2ವಿ ಬೈಕ್‌ನ ಹೊಸ ಆವೃತ್ತಿಯು ಸಂಪೂರ್ಣವಾಗಿ ಕಪ್ಪು ಬಣ್ಣದಲ್ಲಿ ವಿನ್ಯಾಸಗೊಳಿಸಲಾಗಿದೆ. ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು, ಈ ಬೈಕ್ ಮುಂಭಾಗದಲ್ಲಿ ಡಿಸ್ಕ್ ಬ್ರೇಕ್ ,ಹಿಂಭಾಗದಲ್ಲಿ ಡ್ರಮ್ ಬ್ರೇಕ್ ಮತ್ತು ಸಿಂಗಲ್-ಚಾನೆಲ್ ಎಬಿಎಸ್ ವ್ಯವಸ್ಥೆಯನ್ನು ಹೊಂದಿದೆ. 163.2ಸಿಸಿ ಏರ್ ಕೂಲ್ಡ್, ಸಿಂಗಲ್ ಸಿಲಿಂಡರ್ ಎಂಜಿನ್‌ನಿಂದ ಶಕ್ತಿ ಪಡೆದು, 5-ಸ್ಪೀಡ್ ಗೇರ್ ಬಾಕ್ಸ್ ನೊಂದಿಗೆ ಈ ಬೈಕ್ 15 ಬಿಹೆಚ್‌ಪಿ ಪವರ್ ಮತ್ತು 14 ಎನ್ಎಂ ಟಾರ್ಕ್ ಅನ್ನು ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ.
ಇದನ್ನೂ ಓದಿ: ಆಕರ್ಷಕ ಬಣ್ಣದೊಂದಿಗೆ ಬಿಡುಗಡೆಯಾಯ್ತು ಹೊಸ ಹೀರೋ ಗ್ಲಾಮರ್
ಎಕ್ಸ್‌ಟ್ರೀಮ್ 160ಆರ್ 2ವಿ (Hero Xtreme 160R 2V) ಬೈಕ್‌ನ ವಿನ್ಯಾಸವು ಅದರ ಡೈಮಂಡ್ ಫ್ರೇಮ್‌ನಿಂದಾಗಿ ಅತ್ಯಂತ ಬಲಿಷ್ಠವಾಗಿದೆ. ಮುಂಭಾಗದ ಟೆಲಿಸ್ಕೋಪಿಕ್ ಫೋರ್ಕ್ ಮತ್ತು ಹಿಂಭಾಗದ ಮೊನೊಶಾಕ್‌ ಸಸ್ಪೆನ್ಷನ್‌ನ ಸಂಯೋಜನೆಯು ಯಾವುದೇ ರಸ್ತೆಯ ಅಡಚಣೆಯನ್ನು ಸುಲಭವಾಗಿ ನಿಭಾಯಿಸುವಂತೆ ಮಾಡುತ್ತದೆ. 100/80-17 ಗಾತ್ರದ ಮುಂಭಾಗದ ಟೈರ್ ಮತ್ತು 130/70-17 ಗಾತ್ರದ ಹಿಂಭಾಗದ ಟೈರ್‌ಗಳು ಬೈಕ್‌ಗೆ ಉತ್ತಮ ಹಿಡಿತವನ್ನು ನೀಡುತ್ತವೆ. 795 ಎಂಎಂ ಎತ್ತರದ ಸೀಟ್ ಮತ್ತು 12-ಲೀಟರ್ ಪೆಟ್ರೋಲ್ ಟ್ಯಾಂಕ್ ನೊಂದಿಗೆ, ಈ ಬೈಕ್ ದೀರ್ಘ ಪ್ರಯಾಣಕ್ಕೆ ಸೂಕ್ತವಾಗಿದೆ. ಕೇವಲ 145 ಕೆ.ಜಿ ತೂಕವಿರುವ ಈ ಬೈಕ್ ಅನ್ನು ಸುಲಭವಾಗಿ ನಿರ್ವಹಿಸಬಹುದು.
ಹೀರೋ ಎಕ್ಸ್‌ಟ್ರೀಮ್ 160ಆರ್ 2ವಿ ಬೆಲೆ ರೂ. 1.11 ಲಕ್ಷವಾಗಿದ್ದು, ಇದು 4ವಿ ಮಾದರಿಗಿಂತ ರೂ. 28,000 ಅಗ್ಗವಾಗಿದೆ. ಇದು ಬಜಾಜ್ ಪಲ್ಸರ್ ಎನ್ 150 (ರೂ. 1.25 ಲಕ್ಷ) ಮತ್ತು ಯಮಹಾ ಎಫ್‌ಜೆ ಬೈಕ್ ಶ್ರೇಣಿ (ರೂ. 1.17 ಲಕ್ಷ-1.30 ಲಕ್ಷ)ಗಳಿಗೆ ಸ್ಪರ್ಧಿಯಾಗಿದೆ.
ಇದನ್ನೂ ಓದಿ: ಕೈಗೆಟುಕುವ ಬೆಲೆಯಲ್ಲಿ ಹೊಸ ಫೀಚರ್‌ಗಳೊಂದಿಗೆ ಹೀರೋ ಸ್ಪ್ಲೆಂಡರ್ ಬಿಡುಗಡೆ
