ಫೆರಾರಿಯಿಂದ ಹೊಸ ಹೈಬ್ರಿಡ್ Ferrari F80 ಸೂಪರ್ಕಾರ್ ಬಿಡುಗಡೆ: 30 ಕೋಟಿ ಬೆಲೆ, ಕೇವಲ 799 ಕಾರುಗಳು, ಸಂಪೂರ್ಣ ಸೋಲ್ಡ್ ಔಟ್
ಪ್ರಸಿದ್ಧ ವಾಹನ ತಯಾರಕ ಕಂಪನಿಯಾದ ಫೆರಾರಿ ತನ್ನ ಹೊಸ ಹೈಬ್ರಿಡ್ ಸೂಪರ್ಕಾರ್ ಎಫ್80 (Ferrari F80) ಅನ್ನು ಬಿಡುಗಡೆ ಮಾಡುವ ಮೂಲಕ ವಾಹನ ಪ್ರಿಯರನ್ನು ರೋಮಾಂಚನಗೊಳಿಸಿದೆ. 3.6 ಮಿಲಿಯನ್ ಪೌಂಡ್‌ಗಳಷ್ಟು ಬೆಲೆಬಾಳುವ ಈ ಕಾರು, ಸುಮಾರು 30 ಕೋಟಿ ರೂಪಾಯಿಗಳಿಗೆ ಸಮಾನವಾಗಿದೆ. 1200 ಬಿಎಚ್‌ಪಿ ಶಕ್ತಿಯೊಂದಿಗೆ, ಈ ಕಾರು ಗಂಟೆಗೆ 350 ಕಿಲೋಮೀಟರ್‌ಗಿಂತಲೂ ಹೆಚ್ಚಿನ ವೇಗವನ್ನು ಸುಲಭವಾಗಿ ಸಾಧಿಸುತ್ತದೆ. ಫೆರಾರಿ ಈ ಕಾರಿನ ಉತ್ಪಾದನೆಯನ್ನು ಕೇವಲ 799 ಯೂನಿಟ್‌ಗಳಿಗೆ ಸೀಮಿತಗೊಳಿಸಿದ್ದು, 2025ರ ಕೊನೆಯಲ್ಲಿ ಗ್ರಾಹಕರಿಗೆ ಈ ಕಾರುಗಳು ದೊರೆಯಲಿವೆ.
ಫೆರಾರಿಯ ಹೊಸ ಹೈಬ್ರಿಡ್ ಸೂಪರ್ಕಾರ್ ಎಫ್80 ಅನ್ನು ಬಿಡುಗಡೆ ಮಾಡುತ್ತಿದ್ದಂತೆ, ಅದರ ಬುಕಿಂಗ್‌ಗೆ ಅಪಾರ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಕೆಲವೇ ನಿಮಿಷಗಳಲ್ಲಿ ಎಲ್ಲಾ ಕಾರುಗಳು ಮಾರಾಟವಾಗಿ ಹೋದವು. ಇಟಲಿಯ ಮರಾನೆಲ್ಲೋದಲ್ಲಿ ನಡೆದ ಅದ್ಭುತ ಅನಾವರಣ ಕಾರ್ಯಕ್ರಮದಲ್ಲಿ ಈ ಸೀಮಿತ ಆವೃತ್ತಿಯ ಸೂಪರ್ಕಾರ್ ಪ್ರದರ್ಶನಗೊಂಡಿತು.
ಇದನ್ನೂ ಓದಿ: ಲಾಂಬೋರ್ಗಿನಿ ಉರುಸ್ ಎಸ್‌ಇ ಭಾರತಕ್ಕೆ ಆಗಮನ, ಬೆಲೆ ₹ 4.57 ಕೋಟಿ
ಫೆರಾರಿ F80: ಪವರ್ ಟ್ರೈನ್
Ferrari F80, ರೇಸಿಂಗ್ ಕ್ಷೇತ್ರದ ಡೀಎನ್‌ಎಯನ್ನು ತನ್ನಲ್ಲಿ ಅಳವಡಿಸಿಕೊಂಡಿದೆ. ದೀರ್ಘಕಾಲದ ರೇಸಿಂಗ್ ಸ್ಪರ್ಧೆಗಳು ಮತ್ತು ಫಾರ್ಮುಲಾ 1 ರಂತಹ ಗರಿಷ್ಠ ವೇಗದ ಕ್ರೀಡೆಗಳಿಂದ ಪ್ರೇರಿತವಾಗಿ, ಈ ಕಾರು ಅತ್ಯಾಧುನಿಕ ಮೋಟಾರ್‌ಸ್ಪೋರ್ಟ್ ತಂತ್ರಜ್ಞಾನಗಳನ್ನು ಸಂಯೋಜಿಸುತ್ತದೆ. ವಿಶ್ವ ಎಂಡ್ಯುರೆನ್ಸ್ ಚಾಂಪಿಯನ್‌ಶಿಪ್‌ನಲ್ಲಿನ ಫೆರಾರಿಯ ಅಭೂತಪೂರ್ವ ಯಶಸ್ಸು, ವಿಶೇಷವಾಗಿ 24 ಗಂಟೆಗಳ ಲೆ ಮ್ಯಾನ್ಸ್ ಸ್ಪರ್ಧೆಯಲ್ಲಿನ ಅನುಕ್ರಮ ಜಯಗಳು, ಎಫ್80ನ ವಿನ್ಯಾಸದ ಹೃದಯಭಾಗದಲ್ಲಿವೆ. 3.0-ಲೀಟರ್ ಟ್ವಿನ್-ಟರ್ಬೊ V6 ಎಂಜಿನ್‌ಗೆ ವಿದ್ಯುತ್ ಮೋಟರ್‌ಗಳ ಸಂಯೋಜನೆಯು ಈ ಕಾರಿಗೆ ಅದ್ಭುತ ಶಕ್ತಿಯನ್ನು ನೀಡುತ್ತದೆ. ದಹನಕಾರಿ ಎಂಜಿನ್ 900 ಬಿಹೆಚ್‌ಪಿ ಶಕ್ತಿಯನ್ನು ಉತ್ಪಾದಿಸಿದರೆ, ಹೈಬ್ರಿಡ್ ವ್ಯವಸ್ಥೆ ಇನ್ನೂ 300 ಬಿಹೆಚ್‌ಪಿ ಶಕ್ತಿಯನ್ನು ಸೇರಿಸುತ್ತದೆ, ಒಟ್ಟಾರೆ 1200 ಬಿಹೆಚ್‌ಪಿ ಶಕ್ತಿಯನ್ನು ನೀಡುತ್ತದೆ.
ಈ ಹೈಬ್ರಿಡ್ ಸಂಯೋಜನೆಯು ಕಾರಿನ ವೇಗ ಮತ್ತು ಕಾರ್ಯಕ್ಷಮತೆಯನ್ನು ಹೊಸ ಎತ್ತರಕ್ಕೆ ಏರಿಸುತ್ತದೆ. ಫೆರಾರಿ ಎಫ್80 ಮೋಟಾರು ವಾಹನವು 0 ರಿಂದ 100 ಕಿಲೋಮೀಟರ್‌ಗೆ ಕೇವಲ 2.15 ಸೆಕೆಂಡ್‌ಗಳಲ್ಲಿ ವೇಗವನ್ನು ಹೆಚ್ಚಿಸುವ ಅಪೂರ್ವ ಸಾಮರ್ಥ್ಯವನ್ನು ಹೊಂದಿದೆ. ಇದರೊಂದಿಗೆ, ಇದು ಆಂತರಿಕ ದಹನಕಾರಿ ಎಂಜಿನ್‌ನೊಂದಿಗೆ ರಸ್ತೆಯಲ್ಲಿ ಓಡುವ ವಾಹನಗಳಲ್ಲಿ ವಿಶ್ವದ ಅತಿ ವೇಗದ ಕಾರು ಎಂಬ ಹೊಸ ದಾಖಲೆಯನ್ನು ಸ್ಥಾಪಿಸಿದೆ. ಈ ವಾಹನವು ಗಂಟೆಗೆ 350 ಕಿಲೋಮೀಟರ್‌ಗಿಂತ ಹೆಚ್ಚಿನ ವೇಗವನ್ನು ಸಾಧಿಸುವ ಸಾಮರ್ಥ್ಯವನ್ನು ಹೊಂದಿದೆ.
ಇದನ್ನೂ ಓದಿ: ಐಷಾರಾಮಿ ರೋಲ್ಸ್ ರಾಯ್ಸ್ ಕಲಿನನ್ ಸೀರಿಸ್ II ಭಾರತದಲ್ಲಿ ಬಿಡುಗಡೆ, ಬೆಲೆ ಎಷ್ಟು?
ಫೆರಾರಿ F80: ವೈಶಿಷ್ಟ್ಯಗಳು
ಫೆರಾರಿ F80ರಲ್ಲಿ ಫಾರ್ಮುಲಾ 1 ರೇಸಿಂಗ್ ಕಾರುಗಳಿಂದ ಎರವಲು ಪಡೆದ ಗಾಳಿಯ ಹರಿವು ತಂತ್ರಜ್ಞಾನವು ಅದನ್ನು ರಸ್ತೆಯ ರಾಜನನ್ನಾಗಿ ಮಾಡಿದೆ. ಕೆಳನೆಲದ ವಿಶಿಷ್ಟ ವಿನ್ಯಾಸ, ಬಾರ್ಜ್ ಬೋರ್ಡ್‌ಗಳು ಮತ್ತು ಟ್ರೈ-ಪ್ಲೇನ್ ವಿಂಗ್ಗಳು ಸೇರಿಕೊಂಡು 250 ಕಿಮೀ/ಗಂಟೆ ವೇಗದಲ್ಲಿ ಚಲಿಸುವಾಗ ಕಾರಿನನ್ನು ರಸ್ತೆಗೆ ಅಂಟಿಕೊಳ್ಳುವಂತೆ ಮಾಡಲು 1050 ಕಿಲೋಗ್ರಾಂಗಳಷ್ಟು ಡೌನ್‌ಫೋರ್ಸ್ ಅನ್ನು ಉತ್ಪಾದಿಸುತ್ತವೆ. ಹಿಂಭಾಗದ ವಿಂಗ್ ನ್ನು ಗಾಳಿಯ ಹರಿವನ್ನು ಅನುಕೂಲಕ್ಕೆ ತಕ್ಕಂತೆ ಹೊಂದಿಸಬಹುದು.
Ferrari F80ನ ಆಂತರಿಕ ವಿನ್ಯಾಸವು ಚಾಲಕ ಕೇಂದ್ರಿತವಾಗಿದ್ದು, ಪ್ರಯಾಣಿಕರಿಗಿಂತ ಚಾಲಕನಿಗೆ ಹೆಚ್ಚಿನ ಗಮನ ನೀಡಲಾಗಿದೆ. ಚಾಲಕನ ಸೀಟು ಸ್ವಲ್ಪ ಮುಂದೆ ಇರುವುದರಿಂದ, ರೇಸಿಂಗ್ ಕಾರಿನ ಅನುಭವವನ್ನು ನೀಡುತ್ತದೆ. ಬಟರ್‌ಫ್ಲೈ ಡೋರ್‌ಗಳು ಕಾರಿನ ಸೌಂದರ್ಯವನ್ನು ಹೆಚ್ಚಿಸುವುದರ ಜೊತೆಗೆ, ಪ್ರವೇಶ ಮತ್ತು ನಿರ್ಗಮವನ್ನು ಸುಲಭಗೊಳಿಸುತ್ತದೆ.
ಎಫ್80ನ ಚಾಸಿಸ್ ಅನ್ನು ಹಗುರವಾದ ಮತ್ತು ಬಲವಾದ ಕಾರ್ಬನ್ ಫೈಬರ್‌ನಿಂದ ನಿರ್ಮಿಸಲಾಗಿದೆ. ಇದು ಕಾರಿನ ತೂಕವನ್ನು ಗಣನೀಯವಾಗಿ ಕಡಿಮೆ ಮಾಡಿ, ಕಾರಿನ ವೇಗ ಮತ್ತು ನಿರ್ವಹಣೆಯನ್ನು ಹೆಚ್ಚಿಸಿದೆ. ಹೆಚ್ಚಿನ ಬಿಗಿತದಿಂದಾಗಿ, ಎಫ್80 ಹೆಚ್ಚಿನ ವೇಗದಲ್ಲಿ ಸಹ ಸ್ಥಿರವಾಗಿ ಚಲಿಸುತ್ತದೆ.
ವಿಶ್ವದಾದ್ಯಂತ ಕೇವಲ 799 ಫೆರಾರಿ ಕಾರುಗಳನ್ನು ಮಾತ್ರ ನಿರ್ಮಿಸಲಾಗುತ್ತಿದ್ದು, ಆಯ್ದ ಗ್ರಾಹಕರಿಗೆ ಮಾತ್ರ ಈ ಅಪರೂಪದ ಕಾರುಗಳು ದೊರೆಯಲಿವೆ. ಫೆರಾರಿಯ ಮುಖ್ಯ ಮಾರ್ಕೆಟಿಂಗ್ ಮತ್ತು ವಾಣಿಜ್ಯ ಅಧಿಕಾರಿ ಎನ್ರಿಕೊ ಗಲ್ಲಿಯೆರಾ ಅವರು, ನಮ್ಮ ಉತ್ಪಾದನಾ ಸಾಮರ್ಥ್ಯಕ್ಕಿಂತ ಮೂರು ಪಟ್ಟು ಹೆಚ್ಚು ಆರ್ಡರ್‌ಗಳನ್ನು ನಾವು ಈಗಾಗಲೇ ಪಡೆದಿದ್ದೇವೆ ಎಂದು ತಿಳಿಸಿದ್ದಾರೆ. ಮತ್ತು ಎಫ್80 ಎಡಗೈ ಚಾಲನೆಯ ವ್ಯವಸ್ಥೆಯನ್ನು ಹೊಂದಿದೆ. ಆದಾಗ್ಯೂ, ಭಾರತೀಯ ಮಾರುಕಟ್ಟೆಯಲ್ಲಿ ಈ ವಾಹನವನ್ನು ಮಾರಾಟ ಮಾಡುವ ಯೋಜನೆ ಇಲ್ಲ ಎಂದು ಕಂಪನಿಯು ತಿಳಿಸಿದೆ.
