ದೇಶದ ದ್ವಿಚಕ್ರ ವಾಹನ ಮಾರುಕಟ್ಟೆಯಲ್ಲಿ ತನ್ನದೇ ಆದ ವಿಶಿಷ್ಟತೆಯನ್ನು ಸಾಧಿಸಿರುವ ಬಜಾಜ್ ಆಟೋ (Bajaj Auto), ಇತ್ತೀಚೆಗೆ ಹಸಿರು ಕ್ರಾಂತಿಗೆ ಚಾಲನೆ ನೀಡುವ ನಿಟ್ಟಿನಲ್ಲಿ ಮತ್ತೊಂದು ಮೈಲಿಗಲ್ಲನ್ನು ಸ್ಥಾಪಿಸಿದೆ. ಜುಲೈ 5ರಂದು ಬಿಡುಗಡೆಯಾದ ‘ಫ್ರೀಡಂ 125’ (Bajaj Freedom 125) ಸಿಎನ್‌ಜಿ ಮೋಟಾರ್ಸೈಕಲ್, ಆಕರ್ಷಕ ವಿನ್ಯಾಸ ಮತ್ತು ಅತ್ಯುತ್ತಮ ಮೈಲೇಜ್‌ನ ಸಂಯೋಜನೆಯೊಂದಿಗೆ ದ್ವಿಚಕ್ರ ವಾಹನ ಪ್ರಿಯರ ಹೃದಯ ಗೆಲ್ಲುವ ನಿರೀಕ್ಷೆಯಲ್ಲಿದೆ. ದಿನನಿತ್ಯದ ಪ್ರಯಾಣಕ್ಕೆ ಸೂಕ್ತವಾದ ಈ ಮೋಟಾರ್ಸೈಕಲ್, ಪರಿಸರ ಸ್ನೇಹಿ ಆಯ್ಕೆಯನ್ನು ಬಯಸುವ ಗ್ರಾಹಕರಿಗೆ ಹೊಸ ಆಯಾಮವನ್ನು ತೆರೆದಿದೆ.
ಪರಿಸರ ಸ್ನೇಹಿ ಸಾರಿಗೆ ವ್ಯವಸ್ಥೆಯತ್ತ ದೇಶ ಕೊಡುಗೆ ನೀಡುತ್ತಿರುವ ಈ ಸಂದರ್ಭದಲ್ಲಿ, ಬಜಾಜ್ ಫ್ರೀಡಂ 125 (Bajaj Freedom 125) ದ್ವಿಚಕ್ರ ವಾಹನವು ವಿಶ್ವದ ಮೊದಲ ಸಿಎನ್‌ಜಿ (CNG) ದ್ವಿಚಕ್ರ ವಾಹನವಾಗಿ ಹೊಸ ದಾಖಲೆ ಸೃಷ್ಟಿಸಿದೆ. ಈಗಾಗಲೇ ದೇಶದ ಪ್ರಮುಖ ನಗರಗಳಲ್ಲಿ ಜನಪ್ರಿಯತೆ ಗಳಿಸಿರುವ ಈ ದ್ವಿಚಕ್ರ ವಾಹನವು ಬೆಂಗಳೂರಿನ ರಸ್ತೆಗಳಿಗೂ ಕಾಲಿಟ್ಟಿದೆ. ತನ್ನ ಆಕರ್ಷಕ ವಿನ್ಯಾಸ ಮತ್ತು ಅತ್ಯಾಧುನಿಕ ತಂತ್ರಜ್ಞಾನದೊಂದಿಗೆ, ಈ ದ್ವಿಚಕ್ರ ವಾಹನವು ಗ್ರಾಹಕರ ನಿರೀಕ್ಷೆಗಳನ್ನು ಮೀರಿದೆ.
ಶುಕ್ರವಾರ ಬೆಂಗಳೂರಿನಲ್ಲಿ ನಡೆದ ಅದ್ಧೂರಿ ಕಾರ್ಯಕ್ರಮದಲ್ಲಿ ಬಜಾಜ್ ಫ್ರೀಡಂ 125 ಮೋಟಾರ್‌ಸೈಕಲ್‌ಗಳ ಮೊದಲ ಬ್ಯಾಚ್‌ನ ವಿತರಣೆಗೆ ಚಾಲನೆ ನೀಡಲಾಯಿತು. ಹೊಸ ವಾಹನವನ್ನು ಪಡೆದುಕೊಂಡ ಗ್ರಾಹಕರು ಸಂತೋಷದಿಂದ ಕೀಲಿಗಳನ್ನು ಸ್ವೀಕರಿಸಿದರು. ಈಗಾಗಲೇ ರಾಜ್ಯದ ವಿವಿಧ ಭಾಗಗಳಲ್ಲಿ ಈ ಮೋಟಾರ್‌ಸೈಕಲ್‌ಗಳ ವಿತರಣೆ ಪ್ರಾರಂಭವಾಗಿದೆ.
ಬಜಾಜ್ ಫ್ರೀಡಂ 125 ಸಿಎನ್‌ಜಿ ಬೈಕ್: ಬೆಲೆ, ಎಂಜಿನ್
ಬಜಾಜ್ ಫ್ರೀಡಂ 125 (Bajaj Freedom 125) ಸಿಎನ್‌ಜಿ ಮೋಟಾರ್ಸೈಕಲ್ ಈಗ ದೇಶೀಯ ಮಾರುಕಟ್ಟೆಯಲ್ಲಿ ಕೈಗೆಟುಕುವ ಬೆಲೆಯಲ್ಲಿ ಲಭ್ಯವಿದೆ. ರೂ.95,000 ರಿಂದ ರೂ.1.10 ಲಕ್ಷ (ಎಕ್ಸ್ ಶೋರೂಂ) ದರದಲ್ಲಿ ಲಭ್ಯವಿರುವ ಈ ಮೋಟಾರ್ಸೈಕಲ್ ಡ್ರಮ್, ಡ್ರಮ್ ಎಲ್ಇಡಿ ಮತ್ತು ಡಿಸ್ಕ್ ಎಲ್ಇಡಿ ಎಂಬ ಮೂರು ವಿಭಿನ್ನ ಆಯ್ಕೆಗಳೊಂದಿಗೆ ನಿಮ್ಮ ಅಗತ್ಯಕ್ಕೆ ತಕ್ಕಂತೆ ಒಂದನ್ನು ಆರಿಸಿಕೊಳ್ಳಬಹುದು.
ಇದನ್ನೂ ಓದಿ: ಆನ್‌ಲೈನ್‌ನಲ್ಲಿ ಬಜಾಜ್ ಮೋಟಾರ್ಸೈಕಲ್ ಖರೀದಿ: ಫ್ಲಿಪ್‌ಕಾರ್ಟ್‌ನಲ್ಲಿ ಈಗ ಲಭ್ಯ
125 ಸಿಸಿಯ ಏರ್ ಕೂಲ್ಡ್ ಸಿಂಗಲ್ ಸಿಲಿಂಡರ್ ಎಂಜಿನ್‌ನೊಂದಿಗೆ, ಈ ಬೈಕ್ 9.4 ಪಿಎಸ್ ಗರಿಷ್ಠ ಶಕ್ತಿ ಮತ್ತು 9.7 ಎನ್ಎಂ ಪೀಕ್ ಟಾರ್ಕ್ ಅನ್ನು ಸುಲಭವಾಗಿ ಹೊರಹಾಕುತ್ತದೆ. 5-ಸ್ಪೀಡ್ ಗೇರ್‌ಬಾಕ್ಸ್‌ನೊಂದಿಗೆ, ಸರಾಗವಾದ ಗೇರ್ ಶಿಫ್ಟ್‌ಗಳನ್ನು ಅನುಭವಿಸಬಹುದು. ಅಷ್ಟೇ ಅಲ್ಲ, 2 ಲೀಟರ್/ಕೆಜಿ ಸಾಮರ್ಥ್ಯದ ಪೆಟ್ರೋಲ್ ಮತ್ತು ಸಿಎನ್‌ಜಿ ಇಂಧನ ಟ್ಯಾಂಕ್‌ಗಳು ಈ ಬೈಕ್‌ಗೆ ಉತ್ತಮ ಮೈಲೇಜ್ ನೀಡುತ್ತದೆ. ಹ್ಯಾಂಡಲ್‌ಬಾರ್‌ನಲ್ಲಿರುವ ಸ್ವಿಚ್ ಬಳಸಿ ನೀವು ಇಂಧನ ಮೋಡ್‌ಗಳನ್ನು ಸುಲಭವಾಗಿ ಬದಲಾಯಿಸಬಹುದು.
Bajaj Freedom 125: ಮೈಲೇಜ್ ಮತ್ತು ವೈಶಿಷ್ಟ್ಯಗಳು
ಈ ಬೈಕ್ ನಿಮಗೆ ದೀರ್ಘ ಪ್ರಯಾಣದ ಸಂತೋಷವನ್ನು ನೀಡುತ್ತದೆ. ಒಂದೇ ಟ್ಯಾಂಕ್‌ನಲ್ಲಿ ಸಿಎನ್‌ಜಿ ಮೋಡ್‌ನಲ್ಲಿ 200 ಕಿಲೋಮೀಟರ್ ಮತ್ತು ಪೆಟ್ರೋಲ್ ಮೋಡ್‌ನಲ್ಲಿ 130 ಕಿಲೋಮೀಟರ್ ಸೇರಿ ಒಟ್ಟು 330 ಕಿಲೋಮೀಟರ್‌ಗಿಂತ ಹೆಚ್ಚು ದೂರ ಕ್ರಮಿಸಬಹುದು. ಇದು ಪರಿಸರಕ್ಕೆ ಸಹಾಯ ಮಾಡುವುದಲ್ಲದೆ, ನಿಮ್ಮ ಜೇಬಿಗೆ ಸಹಾಯ ಮಾಡುತ್ತದೆ. ಸಿಎನ್‌ಜಿ ಇಂಧನವು ಪೆಟ್ರೋಲ್‌ಗಿಂತ ಶೇಕಡ 26.7% ಕಡಿಮೆ ಇಂಗಾಲದ ಡೈ ಆಕ್ಸೈಡ್ ಅನ್ನು ಹೊರಸೂಸುತ್ತದೆ.
ಈ ಬೈಕ್‌ನ ಸಿಎನ್‌ಜಿ ಟ್ಯಾಂಕ್ ಆಸನದ ಕೆಳಭಾಗದಲ್ಲಿರುವುದರಿಂದ ಬೈಕ್‌ನ ಆಸನದ ಉದ್ದವು ಸಾಮಾನ್ಯ ಬೈಕ್‌ಗಳಿಗಿಂತ ಶೇಕಡಾ 20ರಷ್ಟು ಹೆಚ್ಚಾಗಿದೆ. ಇದು ದೀರ್ಘ ಪ್ರಯಾಣಗಳಿಗೆ ಹೆಚ್ಚಿನ ಆರಾಮವನ್ನು ನೀಡುತ್ತದೆ. ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು, ಸಿಎನ್‌ಜಿ ಟ್ಯಾಂಕ್‌ನ ಮೇಲೆ 11 ವಿಧದ ಅಪಘಾತ ಪರೀಕ್ಷೆಗಳನ್ನು ನಡೆಸಲಾಗಿದೆ. ಈ ಪರೀಕ್ಷೆಗಳಲ್ಲಿ ಟ್ಯಾಂಕ್‌ಗೆ ಯಾವುದೇ ಹಾನಿಯಾಗದಂತೆ ವಾಹನದ ಬಾಡಿ ಫ್ರೇಮ್ ಅನ್ನು ವಿನ್ಯಾಸಗೊಳಿಸಲಾಗಿದೆ.
ಇದನ್ನೂ ಓದಿ: ಬಹುನಿರೀಕ್ಷಿತ ಬಜಾಜ್ ಪಲ್ಸರ್ N160 ಬೈಕ್ ರೂ 1.40 ಲಕ್ಷಕ್ಕೆ ಬಿಡುಗಡೆ
ಬಜಾಜ್ ಫ್ರೀಡಂ 125 (Bajaj Freedom 125) ಮೋಟಾರ್ಸೈಕಲ್ ನಿಮ್ಮ ವೈಯಕ್ತಿಕ ಶೈಲಿಗೆ ತಕ್ಕಂತೆ ಕೆರಿಬಿಯನ್ ಬ್ಲೂ, ಎಬೊನಿ ಬ್ಲಾಕ್ – ಗ್ರೇ, ಪ್ಯೂಟರ್ ಗ್ರೇ – ಬ್ಲಾಕ್, ರೇಸಿಂಗ್ ರೆಡ್ ಮತ್ತು ಸೈಬರ್ ವೈಟ್ ಸೇರಿದಂತೆ ವಿವಿಧ ಬಣ್ಣ ಆಯ್ಕೆಗಳನ್ನು ನೀಡುತ್ತದೆ. ಇದರ ಟಾಪ್ ಎಂಡ್ ಮಾದರಿಯಲ್ಲಿ ಆಧುನಿಕ ವೈಶಿಷ್ಟ್ಯಗಳಾದ ಎಲ್ಇಡಿ ಹೆಡ್‌ಲೈಟ್, ಎಲ್ಇಡಿ ಟೈಲ್ ಲೈಟ್ಸ್ , ಬ್ಲೂಟೂತ್ ಕನೆಕ್ಟಿವಿಟಿ ಹಾಗೂ ಎಲ್‌ಸಿಡಿ ಡಿಸ್ಪ್ಲೇ , ಮತ್ತು ಡಿಸ್ಕ್ ಬ್ರೇಕ್ ಸೌಲಭ್ಯಗಳನ್ನು ನೀಡಲಾಗಿದೆ. 147.8 ಕೆಜಿ ತೂಕದೊಂದಿಗೆ, ಈ ಮೋಟಾರ್ಸೈಕಲ್ ನಿಮ್ಮ ಪ್ರತಿಯೊಂದು ಪ್ರಯಾಣವನ್ನು ಸುಲಭ ಮತ್ತು ಆರಾಮದಾಯಕವಾಗಿಸುತ್ತದೆ.
