ನವೆಂಬರ್ 2022 ಮತ್ತು ಮಾರ್ಚ್ 2023ರ ನಡುವೆ ತಯಾರಿಸಿದ Royal Enfield ಬೈಕ್‌ಗಳಲ್ಲಿ ರಿಫ್ಲೆಕ್ಟರ್ ಸಮಸ್ಯೆ
ರಾಯಲ್ ಎನ್ಫೀಲ್ಡ್(Royal Enfield) ಕಂಪನಿಯು 2022 ನವೆಂಬರ್ ನಿಂದ 2023 ಮಾರ್ಚ್ ಅವಧಿಯಲ್ಲಿ ತಯಾರಿಸಲಾದ ಎಲ್ಲಾ ಬೈಕ್‌ಗಳನ್ನು ಹಿಂಪಡೆಯುವ ನಿರ್ಧಾರವನ್ನು ತೆಗೆದುಕೊಂಡಿದೆ. ಕಂಪನಿಯ ನಡೆಸಿದ ಗುಣಮಟ್ಟ ಪರೀಕ್ಷೆಯಲ್ಲಿ, ಈ ಬೈಕ್‌ಗಳ ಹಿಂಭಾಗ ಮತ್ತು ಸೈಡ್ ರಿಫ್ಲೆಕ್ಟರ್‌ಗಳು (Rear or Side Reflectors) ಅಗತ್ಯವಿರುವಷ್ಟು ಪ್ರಕಾಶವನ್ನು ಹಿಂತಿರುಗಿಸದಿರುವುದು ಕಂಡುಬಂದಿದೆ. ಈ ಕೊರತೆಯಿಂದಾಗಿ, ಕಡಿಮೆ ಬೆಳಕಿನಲ್ಲಿ ವಾಹನ ಚಲಾಯಿಸುವಾಗ ರಸ್ತೆ ಸುರಕ್ಷತೆಗೆ ಧಕ್ಕೆಯಾಗುವ ಸಾಧ್ಯತೆ ಇದೆ.
ಈ ದೋಷ ಮತ್ತು ಗುಣಮಟ್ಟದ ಸಮಸ್ಯೆಯಿಂದಾಗಿ ಕಂಪನಿ ತನ್ನ ಕೆಲವು ವಾಹನಗಳನ್ನು ಹಿಂಪಡೆಯಲು ಮುಂದಾಗಿದೆ. ಈ ನಿರ್ಧಾರ ಗ್ರಾಹಕರ ಸುರಕ್ಷತೆಯನ್ನು ಮುಖ್ಯವಾಗಿಟ್ಟುಕೊಂಡು ತೆಗೆದುಕೊಳ್ಳಲಾಗಿದೆ. ಕಂಪನಿ ಎಲ್ಲಾ ಮೋಟಾರ್‌ಸೈಕಲ್‌ಗಳ ರಿಫ್ಲೆಕ್ಟರ್‌ಗಳನ್ನು ಉಚಿತವಾಗಿ ಬದಲಿಸಲು ಮುಂದಾಗಿದೆ.
ಇದನ್ನೂ ಓದಿ: ರಾಯಲ್ ಎನ್ಫೀಲ್ಡ್ ಕ್ಲಾಸಿಕ್ 350 ಹೊಸ ಎಡಿಷನ್‌ ಬಿಡುಗಡೆ, ಬೆಲೆ ಮತ್ತು ವೈಶಿಷ್ಟ್ಯಗಳು
ಈ ಕ್ರಮವನ್ನು ನಿರ್ದಿಷ್ಟ ಸಮಯದೊಳಗೆ ಎಲ್ಲಾ ಮಾರುಕಟ್ಟೆಗಳಲ್ಲಿ ಕೈಗೊಳ್ಳಲಾಗುವುದು. ಯಾವೆಲ್ಲಾ Royal Enfield ಮಾದರಿಗಳನ್ನು ಹಿಂಪಡೆಯಲಾಗುತ್ತಿದೆ ಎಂಬ ಸಂಪೂರ್ಣ ಮಾಹಿತಿಯನ್ನು ರಾಯಲ್ ಎನ್ಫೀಲ್ಡ್ ಕಂಪನಿ ಇನ್ನೂ ಬಹಿರಂಗಪಡಿಸಿಲ್ಲ. ಈ ಪ್ರಕ್ರಿಯೆಯನ್ನು ಹಂತ ಹಂತವಾಗಿ ಕೈಗೊಳ್ಳಲಾಗುವುದು ಎಂದು ಕಂಪನಿ ತಿಳಿಸಿದೆ.
ಪ್ರಾರಂಭದಲ್ಲಿ, ದಕ್ಷಿಣ ಕೊರಿಯಾ, ಅಮೆರಿಕ ಮತ್ತು ಕೆನಡಾ ದೇಶಗಳಲ್ಲಿ ಈ ಹಿಂಪಡೆಯುವಿಕೆ ಕಾರ್ಯಕ್ರಮವನ್ನು ಜಾರಿಗೆ ತರಲಾಗುವುದು. ನಂತರ ಭಾರತ, ಬ್ರೆಜಿಲ್, ಲ್ಯಾಟಿನ್ ಅಮೆರಿಕ, ಯುರೋಪ್ ಹಾಗೂ ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಈ ಯೋಜನೆಯನ್ನು ವಿಸ್ತರಿಸಲಾಗುವುದು. ಗ್ರಾಹಕರ ಸೌಲಭ್ಯಕ್ಕಾಗಿ, ಕಂಪನಿಯ ಪ್ರತಿನಿಧಿಗಳು ಹಿಂಪಡೆಯುವಿಕೆ ಪ್ರಕ್ರಿಯೆ ಕುರಿತು ಸಂಪೂರ್ಣ ಮಾಹಿತಿಯನ್ನು ಒದಗಿಸುವರು ಮತ್ತು ಕೇವಲ 15 ನಿಮಿಷಗಳ ಅವಧಿಯಲ್ಲಿ ರಿಫ್ಲೆಕ್ಟರ್ ಅನ್ನು ಬದಲಾಯಿಸುವ ಸೇವೆಯನ್ನು ಉಚಿತವಾಗಿ ನೀಡುವರು.
ಇದನ್ನೂ ಓದಿ: ರಾಯಲ್ ಎನ್ಫೀಲ್ಡ್ ಗೆರಿಲ್ಲಾ450 ರೂ. 2.39 ಲಕ್ಷಕ್ಕೆ ಬಿಡುಗಡೆಯಾಗಿದೆ
ನಮ್ಮ ಪ್ರತಿಯೊಂದು ಮೋಟಾರ್‌ಸೈಕಲ್ ಕೂಡ ಅತ್ಯಂತ ಕಟ್ಟುನಿಟ್ಟಾದ ಗುಣಮಟ್ಟದ ಪರೀಕ್ಷೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ಇದರರ್ಥ ನಮ್ಮ ಗ್ರಾಹಕರು ವಿಶ್ವದರ್ಜೆಯ ಗುಣಮಟ್ಟ ಮತ್ತು ಬಾಳಿಕೆ ಬಗ್ಗೆ ಖಚಿತವಾಗಿರಬಹುದು. ರಾಯಲ್ ಎನ್‌ಫೀಲ್ಡ್‌ನಲ್ಲಿ, ನಮ್ಮ ಸವಾರರ ಸುರಕ್ಷತೆ ನಮ್ಮ ಆದ್ಯತೆಯಾಗಿದೆ. ನಮ್ಮ ಪ್ರತಿಯೊಂದು ಮೋಟಾರ್‌ಸೈಕಲ್ ಕೂಡ ಸುರಕ್ಷಿತ ಮತ್ತು ಆರಾಮದಾಯಕವಾದ ಸವಾರಿ ಅನುಭವವನ್ನು ನೀಡುವಂತೆ ನಾವು ಕಾಳಜಿ ವಹಿಸುತ್ತೇವೆ. ನಮ್ಮ ಗ್ರಾಹಕರ ಸಂತೋಷವೇ ನಮ್ಮ ಯಶಸ್ಸಿನ ಮೂಲಮಂತ್ರ ಎಂದು ರಾಯಲ್ ಎನ್ಫೀಲ್ಡ್ ಕಂಪನಿಯು ಸ್ಪಷ್ಟಪಡಿಸಿದೆ.
